27 Industrialdea eraldatzeko bigarren fasea hasiko du laster Donostiako Sustapenak

Astigarragako Udalarekin elkarlanean,  lehen fasean, seinaleztapen-sistema berria jarri, webgunea sortu eta enpresen izaera berritzailea bultzatu du Donostiako Sustapenak 

27 Industrialdea modernizatzeko lehen faseko lanak bukatuta, bigarren fasea hasiko du laster  Donostiako Sustapenak, hiriaren garapen ekonomiko jasangarriaz arduratzen den udal elkarteak.

Lehen fasea Astigarragako Udalaren eta 27 Industrialdeko Jabeen Elkartearen laguntzaz eta Eusko Jaurlaritzaren Izartu 2 programak babestuta gauzatu da eta ondoko emaitzak eman ditu:

• Seinaleztapen-sistema berria jarri da, erabiltzaileen irigarritasun eta segurtasuna hobetzeko. Helburu nagusiak ondokoak dira: autoen eta pertsonen zirkulazioa arintzea, komunikazioa indartzea eta industrialdeko enpresak sustatzea. 

  Horretarako, hiru argibide-taula jarri dira, industriaguneko sektore bakoitzeko bat. Enpresak errazago aurkitu ahal izateko, sektore bakoitzari kolore bat dagokio: gorria, horia eta berdea. Horretaz gain, industriagunerako sarreran taula digital bat jarri da;  honek enpresen kokapen zehatza erakutsi eta zirkulazioa bideratzen du; gainera, ibilbideak inprimatzeko aukera ere eskaintzen du.

• Seinaleztapenarekin batera, enpresen lehiakortasuna hobetzea da 27 Industrialderako beste lehentasun bat. Horretarako, bi ekimen jarri dira martxan:
  • Webgune bat egin da, 27 Industrialdeko enpresek hornitzaileekin, balizko bezeroekin eta sektoreko beste enpresekin harremanak izan ahal izateko eta sinergiak sortzeko tresna gisa. Horretaz gain, industrialdeko enpresen arteko komunikazio zuzena ahalbidetzen du, informazioa jasotzeko eta barne-antolamenduari dagozkion kontuak konpontzeko.
  • Donostiako Sustapenak berrikuntza diagnosiak egin ditu. Hauei esker produktu berritzaileak, negozio ildo berriak eta kudeaketarako tresna berriak hauteman ditu. 2007. urtearen amaierarako 14 azterketa egin zituen, eta aurten 27 Industrialdean berrikuntza sustatzeko lanean jarraituko du.

Berrikuntzarako bigarren faserako ondoko ekimenak daude aurreikusita: Enpresa Zentro Berri  bat, haurtzaindegi bat eta teknologia berriak aplikatzeko zentro bat (Democenter), gaur egun erabiltzen ez den eraikin batean. Egitura berri honek industrialdeko enpresei eta langileei zerbitzuren bat eskaintzen dioten enpresak hartuko ditu. 

Haurtzaindegiari dagokionez, 27 industrialdeko langileek eta Martuteneko bizilagunek erabili ahal izango dute.

Enpresa Gune berriak auditorioa eta bilera gelak izango ditu industrialdeko eta izena ematen duten Donostiako gainontzeko enpresen eskura. Industrialdekoak ez diren Donostiako enpresek Donostiako Sustapenan izena eman behar dute zerbitzuok erabiltzeko: 943481764 - www.fomentosansebastian.org.

Horretaz gain, gainotzeko enpresa guneetan bezala (Bidebieta, Zentek, Cemei, Belartza eta bidean den Ikusentzunezko Berrikuntza Gunea), Donostiako Sustapenak merkatukoak baino alokairu merkeagoak eskainiko dizkie enpresei.

Enpresa gunea datorren urtean martxan jartzea dago aurreikusita.

27 INDUSTRIALDEAREN DATUAK

Martuteneko 27 industrialdean 400 enpresa baino gehiago daude, gehienak banakakoak eta sozietate mugatuak. Lehehengo enpresak 1930ean sortu ziren eta egungo enpresen %22 1980 baino lehenenagokoak dira; hala ere, industrialdearen hazkunde nabarmenena 90eko hamarkadan eman zen. Azken 15 urteetan enpresen erdia baino gehiago sortu dira. Guztira 4.000 langile baino gehiago daude. 

Industrialde honek Donostiari ekar diezaioken aberastasuna ikusita, Donostiako Sustapenak egungo beharrak aztertu eta industrialdea berritu eta indartzeko neurriak jarri ditu martxan. Hainbat arlo aztertu diren arren, garraioa eta teknologia berriak izan dira nagusiak. Ondoko ondorioak atera dira:

• 27 industrialdeko enpresa gehienak (%58) industria sektorekoak dira eta %20 zerbitzuen sektorekoak. Industrialdeko enpresetan langile asko (4.000 baino gehiago) eta bezero eta hornitzaile asko ibiltzen dira. Langileen %63 Donostian bizi dira eta gehienek kotxea erabiltzen dute lanera joateko. Langileen %3,3k autobus publikoa erabiltzen dute. Egunero, enpresa bakoitzera bezeroen bost auto iristen dira.
• Enpresa gehienek ordenagailu bat baino gehiago dute, enpresako 3,5 batezbeste. Posta elektronikoa eta internet bidezko banka asko erabilzten dute; merkataritza elektronikoa, berriz, oso enpresa gutxik erabiltzen dute.